Milli Televiziya və Radio Şurasının sədri Nuşirəvan Məhərrəmli ASAN Radioya eksklüziv müsahibəsində bildirib ki, tütün məmulatlarının zərərli bir hal olduğunu göstərmək, hesab edirəm ki, hər bir vətəndaş üçün və eyni zamanda təşkilat üçün lazımlı bir işdir. Biz də çalışacağıq ki, səlahiyyətlərimiz çərçivəsində bu işi həyata keçirək.
Şura sədrinin sözlərinə görə, çox gözəl haldır ki, burada təmsil etdiyi qurumun üzərinə düşən işlər konkret göstərilib: "Yəni saat neçədən-neçəyə qədər və hansı məzmunda verilişlər yayımlanacaq və hər ay da bunun hesabatı Şuraya təqdim olunacaq. Cərimələr var - bilirsiniz və cərimələr də normal cərimələrdir. Əgər televiziya kanalı bu qanunun tələblərini yerinə yetirməyəcəksə, təbii ki, ona qarşı da tədbirlər görüləcək".
Xatırladaq ki, "Tütün məmulatlarının istifadəsinin məhdudlaşdırılması haqqında" qanun birinci oxunuşda qəbul olunub
Qanunla Azərbaycanda televiziya və radio efirlərində hər ay 90 dəqiqədən az olmayaraq tütün (siqaret) əleyhinə verilişlər hazırlanaq, bununla bağlı həmin radio və ya televiziya Milli Televiziya və Radio Yayımı Şurasına hər ay hesabat verəcək.
Qanun layihəsinin 12-ci (Kütləvi informasiya vasitələrində tütündən istifadənin zərəri və ətraf mühitdəki tütün tüstüsünün ziyanlı təsiri barədə biliklərin təbliği) maddəsində qeyd olunur ki, Azərbaycan ərazisində fəaliyyət göstərən bütün televiziya və radio yayımçıları müvafiq icra hakimiyyəti orqanlarının, elm müəssisələrinin və qeyri-hökumət təşkilatlarının dəstəyi ilə tütün istifadəsinin və sağlamlığa zərər vuran digər vərdişlərin mənfi təsiri barədə xəbərdaredici, maarifləndirici və tərbiyəvi mövzuda verilişlər hazırlamalı, bu mövzulara ayda 90 dəqiqədən az olmayan efir vaxtı ayırmalıdır.
Bu verilişlərin 45 dəqiqəsi saat 17:30-23:00 arasında olmaqla, saat 08:00-23:00 arasında yayımlanmalı, verilişlərin surəti hər ay Milli Televiziya və Radio Yayımı Şurasına təhvil verilməlidir.
MTRŞ-nın sədri Nuşirəvan Məhərrəmlinin müsahibəsindən bir hissə: