“Bəzi layt siqaretlərin üzərində nikotinin az olması barədə məlumatın yazılması tütünə qarşı mübarizədə problem yaradır. Layt siqaretlərin insan orqanizminə ziyansız olması barədə verilən məlumatlar absurddur”.
Trend-in məlumatına görə, bunu Milli Məclisin Səhiyyə komitəsinin sədri Əhliman Əmiraslanov “Tütünlə mübarizəyə dair Azərbaycan qanunvericliyinin gücləndirilməsi” mövzusunda keçirilən tədbirdə çıxış edərkən deyib.
Ə.Əmiraslanov bildirib ki, dünyada tütünlə mübarizəyə qarşı hazırlanan qanunlarda birdən-birə sərt tədbirlər nəzərdə tutulmur:
“Birdən-birə ciddi sərtləşdirilmiş tədbirlər həyata keçirməyin nəticəsinin olacağına inanmıram. Biz nə qədər qadağalar qoysaq da, tütündən istifadə etmənin qarşısını tam ala bilməyəcəyik. Burada siqaretin keyfiyyəti məsələsi ortaya çıxır. Dünyada siqaret istehsal edən ölkələr buna qarşı mübarizə aparmağa başlayanda öz məhsullarını digər ölkələrə göndərirlər. Eyni zamanda, ölkəyə gətirilən siqaretlərin keyfiyyəti də müzakirə mövzusu olmalıdır”.
Ə.Əmiraslanov qeyd edib ki, Ümumdünya Səhiyyə Təşkilatının məlumatına əsasən, dünyada hər 6 saniyədən bir tütün məmulatından istifadə edən 1 insan dünyasını dəyişir:
"Hər il 15 milyon insan tütün məmulatından istifadə istifadəyə etdiyinə görə dünyasını dəyişir. Ağciyər xərcənginə rast gəlmə halları tütün məmulatlarından istifadə edənlər arasında etməyənlərdən 30 dəfə, miokart infaktı isə 15 dəfə çoxdur".
Ə.Əmiraslanov deyib ki, siqaretin tüstüsündən əziyyət çəkənlərin hüquqlarının qorunmasına daha çox diqqət yetirilməlidir:
“Baxmaq lazımdır ki, siqaret çəkənlərin, yoxsa siqaretin tüstüsündən əziyyət çəkənlərin hüquqlarına üstünlük verək? Şübhəsiz ki, ikinciyə üstünlük verilməlidir. Siqaret tüstüsündən əziyyət çəkənlərin böyük əskəriyyətinin uşaqlar olduğunu nəzərə alsaq, bunun nə dərəcə əhəmiyyətli olduğunu görmək olar”.
Ə.Əmiraslanov bildirib ki, daha bir məsələ - Azərbaycanın dünyada siqaret çəkən insanların sayına görə necənci yerdə olması müəyyənləşdirilməlidir:
“Bir çox ölkələr üzrə bu göstərici var. Ancaq təəssüf ki, mən Azərbaycan üzrə belə bir statiskaya rast gəlmədim”.